दक्षिण कोरिया सरकारले अवैधानिक विदेशी कामदारबाट जन्मिएका सबै बच्चालाई वैधानिकता दिने तयारी थालेको छ । बच्चा बालअधिकार तथा सरकारी सुविधाबाट वञ्चित नहुन् भन्ने उद्देश्यअनुरुप नयाँ नियम लागू गर्न लागिएको हो ।

कोरियामा हाल अवैधानिक विदेशीसँग पुनः विवाह गर्ने महिलाबाट जन्मिएको बच्चाले कानूनी मान्यता नपाउने व्यवस्था छ । कानूनमन्त्री पार्क बेओम्कलले बाल अधिकारको जगेर्ना, बच्चा बेचबिखन उन्मूलन तथा बच्चाको मानव अधिकारको रक्षा गर्न नयाँ कानुनले सहयोग गर्ने बताएका छन ।

यस्ता बालकले बीमालगायत अन्य सरकारी तथा सामाजिक सुविधा पनि प्राप्त गर्ने बताइएको छ । कानून लागू भएपछि यस्ता बच्चाले अनिवार्य शिक्षा तथा खोप कार्यक्रममा समेत सहभागी हुन पाउनेछन ।कोरियामा हालसम्म यस्तै तवरले जन्मिएर दर्ता नभएका करिब २० हजार बढी बच्चा भएको अनुमान छ ।