पाहुना टोली पपुवा न्युगिनी (पीएनजी) ले नेपालसँगको दुई खेलको एकदिवसीय क्रिकेट सिरिजमा क्लिन स्विप गरेको छ । कीर्तिपुरस्थित त्रिवि क्रिकेट मैदानमा शनिबार भएको दोस्रो एवम् अन्तिम एकदिवसीयमा नेपाललाई ३ विकेटले हराउँदै पीएनजीले सिरिज २–० ले जितेको हो ।

शुक्रबार भएको पहिलो खेलमा नेपाल ६ रनले पराजित भएको थियो । नेपालले दिएको २ सय ७९ रनको लक्ष्य पीएनजीले ४८ ओभर ४ बलमा ७ विकेट गुमाएर पूरा गर्यो । पीएनजीको जितमा लिगा साकाले ९० रन, रिले हेकुरेले अविजित ४८, सेसे बाउले ३८, चार्लेस अमिनीले ३५ र चाड सोपरले अविजित १६ रन बनाए । नेपालका लागि सोमपाल कामीले ३, पवन सर्राफले २ तथा सन्दीप लामिछाने र आरिफ शेखले १–१ विकेट झारे ।

यसअघि टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २ सय ७८ रन बनाएको थियो । नेपालका लागि दिपेन्द्र सिंह ऐरीले शतक प्रहार गरे । १ सय ४० बलमा ७ चौका प्रहार गर्दै १ सय ५ रन बनाएका ऐरी एकदिवसीय अन्तराष्ट्रियमा शतक बनाउने तेस्रो नेपाली खेलाडी बन्न सफल भए ।

नेपालका लागि दिपेन्द्र देवले ७२, रोहित पौडेलले ३५, भिम सार्कीले २६, कप्तान सन्दीप लामिछानेले २४ रन बनाए । अन्य खेलाडीले दोहोरो अंक छुन सकेनन् । पीएनजीका लागि अलेइ नाओले ३, नोरमान भानुअले २ तथा चाड सोपर र चार्ल्स अमिनीले १–१ विकेट हात पारे । एकदिवसीय र त्रिदेशीय टी–ट्वान्टी सिरिजका लागि पीएनजी नेपाल भ्रमणमा आएको हो ।