आईसीसी पुरुष टी–ट्वान्टी विश्वकप अन्तर्गतको ग्लोबल छनोट ए मा सहभागिता जनाउन नेपाली राष्ट्रिय क्रिकेट टोली आज ओमान प्रस्थान गर्दैछ । विश्वकपमा छनोट हुने लक्ष्य बोकेको नेपाली टोली राति ८ बजे ओमान जान लागेको हो । छनोट खेलहरु फेब्रुरुअरी १८ देखि २४ तारिखसम्म हुनेछ । छनोट समूह ‘ए’ मा नेपाल, क्यानाडा, फिलिपिन्स र ओमान रहेका छन् ।

समूह ‘बी’ मा युएई, बहराईन, आयरल्यान्ड र जर्मनी रहेका छन् । नेपालले फेब्रुअरी १८ मा ओमानसँग पहिलो खेलमा प्रतिस्पर्धा गर्नेछ । फिलिपिन्ससँग फेब्रुअरी १९ र क्यानाडासँग फेब्रुअरी २१ मा प्रतिस्पर्धा गर्नेछ । समूह चरणको खेलपछि शीर्ष दुई टोली दुबै समूहबाट सेमिफाइनलमा प्रवेश गर्नेछन् । सेमिफाइनल खेलहरु फेब्रुअरी २२ तारिखमा हुनेछ ।

फाइनल भने फेब्रुअरी २४ तारिखमा हुनेछ । फाइनल प्रवेश गर्ने दुबै टोली अष्ट्रेलियामा अक्टोबरमा आईसीसी पुरुष टी–ट्वान्टी विश्वकपको लागि छनोट हुनेछन् । छनोट अघि नेपालले ओमानमा चारदेशीय टी–ट्वान्टी सिरिज खेल्नेछ । सिरिजमा नेपालसहित आयरल्यान्ड, युएई र ओमान रहेका छन् ।