केहिसमय अगाडी काठमान्डौको तारकेश्वरको दुइवटा वडामा देखिएको बर्डफ्लु अब राजधानी बाहिर सुर्खेतमा देखा परेको छ । वीरेन्द्रनगर–१२ नौलोटोलमा दुई वटा कुखुरा फर्ममा बर्डफ्लु देखिएको हो। बर्डफ्लु देखिएपछि शनिबार झण्डै ४०० कुखुरा र परेवाहरु नष्ट गरिएको छ। कुखुरामा बर्वफ्लु पुष्टि भएको पशुसेवा विभागको केन्द्रीय प्रयोगशालाले सुर्खेतले जानकारी दिएको छ ।

‘केही दिनअघि सुर्खेतमा बर्डफ्लु आशंका लागेपछि परीक्षणका लागि केन्द्रमा पठाएका थियौँ’ पशुपन्छी विकास निर्देशनालय कर्णाली प्रदेशका सूचना अधिकारी कृष्णप्रसाद चपाईले भने, ‘बर्डफ्लु पुष्टि भएपछि झण्डै ४०० कुखुरा र परेवा नष्ट गरिएको छ।’

बर्डफ्लु देखिएपछि तत्काललाई भारतबाट कुखुरा ल्याउन प्रतिबन्ध लगाउने, शंकास्पद स्थानमा परीक्षण गर्ने र कुखुरा नष्ट गरेका कृषकलाई राहत वितरण लगायतका कार्यक्रमहरु गर्ने सूचना अधिकारी चपाइले बताए। देशका विभिन्न स्थानमा बर्डफ्लु देखा परिरहदा समेत राजधानीमा कुखुराको मासु प्रतीकेजी ३८० रुपैया रहेको छ । विक्रेताहरुका अनुसार मासुको विक्रिमा कमी देखीएपनी मासुको भाउमा कुनै गिरावट आएको छैन ।