दक्षिणी मेक्सिकोमा आप्रवासी बोकेको एउटा ट्रक दुर्घटनाग्रस्त हुँदा कम्तिमा ५४ जनाको मृत्यु भएको छ भने सयभन्दा बढी घाइते भएका छन् । चियापास राज्यको एउटा पुलमा ठोकिएर ट्रक दुर्घटनाग्रस्त हुँदा ट्रकमा सवार करिब दुई सय आप्रवासीमध्ये उनीहरुको मृत्यु भएको हो ।

दुर्घटनापछि ट्रक सडकमा उत्तानो परेको अवस्थामा भेटिएको स्थानीय अधिकारीहरुले बताएका छन् । दुर्घटनाका घाइतेमध्ये केहीको अवस्था गम्भीर रहेको बताइएको छ । घाइते हुनेमा महिला र बालबालिका समेत रहेको बीबीसीले जनाएको छ । सो ट्रकले मध्यअमेरिकी मुलुकहरुका आप्रवासीलाई होन्डुरसबाट मेक्सिकोतर्फ लैजाँदै गरेको प्रारम्भिक अनुसन्धानमा खुलेको छ । ग्वाटेमालासँग जोडिएको चियापास राज्य गैरकानुनी आप्रावासीका लागि मुख्य प्रवेशद्वारका रुपमा परिचित रहेको छ ।