कोरोना भाइरसको नयाँ भेरियन्ट ओमिक्रोनको संक्रमण बढेसँगै चीनले खोपमाथिको अध्ययन अघि बढाएको छ । नयाँ भेरियन्टमा अहिले उपलब्ध खोपले काम नगर्न सक्ने आशंका बढिरहेको बेला चीनले अध्ययन थालेको हो ।

चीनको सिनो बायोलोजिकलले ओमिक्रोन भेरियन्टको प्रमुख भाग विकास गरिएको र यसको प्रयोग कोरोना खोपको प्रभावकारिताको अध्ययनको लागि गरिने जानकारी दिएको हो । परीक्षणले ओमिक्रोन भेरियन्टविरुद्धको एन्टिबडी विकासको लागि सहयोग पुग्ने कम्पनीको दाबी छ ।

सिनो बायोलोजिकलले छ दिनमा यो भेरियन्टको संरचना, कोषको प्रकृति र त्यसको गुणस्तर परीक्षणजस्ता काम सकिसकेको छ । केही दिनमा नै यो भेरियन्टविरुद्धको रिएजेन्ट सार्वजनिक गरिने कम्पनीले बताएको छ । चीनका विभिन्न कम्पनीहरुले पनि ओमिक्रोनलाई रोक्न सक्ने किसिमको खोप विकास गर्न काम गरिरहेका छन । ओमिक्रोन अहिलेसम्मकै सबैभन्दा धेरै उत्परिवर्तित भेरियन्ट हो ।