पश्चिम नेपालको प्रमुख पर्यटकीय गन्तव्य बर्दिया राष्ट्रिय निकुञ्ज र ठाकुरद्वारा क्षेत्रमा पर्यटकलाई लक्षित गर्दै पर्यटन व्यवसायीले लगानी बढाएका छन् । पछिल्लो समय कोरोनाका कारण धरासायी बनेको पर्यटन व्यवसाय फेरी पुरानै लयमा फर्काउन सरकारले राहतका प्याकेज ल्याउनु पर्ने व्यवसायी माग छ ।

पर्यटक आवागमनलाई लक्षित गर्दै बर्दिया ठाकुरद्वराका पर्यटन व्यवसायीहरुले सुविधा सम्पन्न होटल तथा रिसोर्ट संचालनमा ल्याएका छन् । पर्यटन व्यवसायीहरुले लगानी बढाइरहँदा कोरोनाका कारण पछिल्लो समय बर्दिया राट्रिय निकुञ्ज विगतमा लामो समय बन्द रहेकाले व्यवसायमा नकारात्मक असर परेकाले राहतका प्याकेज ल्याउन व्यवसायीहरुले माग गरेका छन् ।

पर्यटकका लागि प्याकेज दिएर पर्यटन प्रवद्र्धन गर्दै आएका ब्यबसायीहरुले भारतका ट्राभल एजेन्सीलाई सरकारी स्तरबाटै समन्वय गरेर पर्यटक भित्र्याउने वातावरण बनाउन समेत माग गरेका छन ।

बाघ हेर्नको लागि प्रख्यात बर्दिया राष्ट्रिय निकुञ्जमा हात्ती, गैडा, चितल, जरायो र गोही हेरेर मनोरञ्जन लिन सकिन्छ । गत असोज १ गतेदेखि बर्दिया राष्ट्रिय निकुञ्ज खुला भएसंगै पर्यटक आवागमन बढ्दै गएको छ । व्यवसायीहरुले जंगल सफारी लगायतका प्याकेज दिएर पर्यटकको मन जित्ने गरेका छन् । जैविक विविधताले भरिपूर्ण बर्दिया राष्ट्रिय निकुञ्जमा पर्यटकहरु देश बिदेशबाट पुग्ने गरेका छन ।