भोजपुरमा चरण क्षेत्रको अभावले परम्परागत रुपमा गरिदै आएको भेडापालन व्यवसाय संकटमा पर्न थालेकोे छ । चरण क्षेत्रको अभावसँगै नयाँ पुस्ताको रोजाईमा नपर्दा यो व्यवसाय संकटमा पर्ने अवस्था आएको हो ।

भोजपुरको माथिल्लो भेगका अधिकांश ठाउँका स्थानीयको मुख्य पेशाको रूपमा रहेको भेडापालन व्यवसाय चरन क्षेत्रको अभावले संकटमा पर्न थालेको हो । भेडापालनबाट राम्रै आम्दानी हुने भए पनि चरण क्षेत्र खुल्ला नहुँदा तथा नयाँ पुस्ताको रोजाइमा नपर्दा व्यवसाय संकटमा पर्ने अवस्था भएको भेडापालक कृषकहरुको भनाइ छ ।

हरेक दुख कष्टका खेपेर वर्षभरि लेकवेंसी गर्दै भेडापालन व्यवसाय गरिरहेको भएपनि सामुदायिक वनले चरीचरणमा रोक लगाएपछि व्यावसाय सञ्चालनमा समस्या हुने गरेको उनीहरुको भनाइ छ ।

जिल्लाको टेम्के, सिलिचुङ, चखेवा, मैयुङ, किमालुङ लगाएतका माथिल्लो भेगमा कृषकहरुले भेडापालन गर्दै आएका छन् । केही वर्ष अघिसम्म यहाँका अधिकांश मानिसको पेशा नै भेडापालन भएपनि अहिले यो पेशाप्रतिको आकर्षण क्रमिक रूपमा घट्दै गएको कृषकहरुको भनाइ छ ।

चरण क्षेत्रको अभावसँगै नयाँ पुस्ताका युवामा वैदेशिक रोजगारप्रतिको मोहका कारण पनि यो पेशा संकटमा परेको हो । भेडाको ऊनबाट राडी, लुकुनी, ज्वारीकोट लगाएको सामग्री बनाउन सकिन्छ । राडी, पाखी बनाउने जनशक्ति अभावका कारण यस्तो सामग्रीको उत्पादनमा समेत कमि आएको कृषकको भनाइ छ ।

भेडापालन व्यवसायमा धेरै दुःख गर्नु पर्ने किसानको भनाइ छ । सामुदायिक वनहरुले चरिचरणमा रोक लगाउदा व्यवसाय संकटमा पर्दै गएको प्रति उनीहरु चिन्तित रहेका छन् । यसर्थ परम्परागत खालका यस्ता व्यवसायमा लाग्ने कृषकहरुलाई सरकारले प्रोत्साहन गर्न आवश्यक छ ।