संस्कृति, पर्यटन तथा नागरिक उड्डयनमन्त्री भानुभक्त ढकालले कोरोना महामारी नियन्त्रणका लागि सरकार सकभर लकडाउन नगर्ने पक्षमा रहेको बताएका छन । नेपाल पर्वतारोहण सङ्घ (एनएमए) को ३०औँ वार्षिक साधारणसभामा मन्त्री ढकालले विपत्ति आइलागेमा सामना गर्नुको विकल्प पनि नरहेको भन्दै अहिलेको अवस्थामा सजकता अपनाउन आग्रह गरे ।

कोरोनाबाट सबैभन्दा बढी प्रभावित बनेको मुलुकको पर्यटन क्षेत्रमा पछिल्ला दिनमा केही सुधाराका सङ्केत देखिए पनि लगातार बढिरहेको सङ्क्रमितको सङ्ख्याले थप भयाबह स्थिति सिर्जना हुने खतरा बढेको उल्लेख गरे । उनले पर्वतारोहण क्षेत्रमा नीतिगत समस्या वा उल्झन भए त्यसको सहजीकरण गर्न आफू तत्पर रहेको समेत बताए ।

कार्यक्रममा पर्यटन क्षेत्रमा योगदान गर्ने विभिन्न व्यक्ति तथा संस्थालाई सम्मान गरिएको थियो । दावा नर्बु पर्वतीय पर्यटन पत्रकारिता पुरस्कार पत्रकारद्वय जगदिश तिवारी र अर्जुन पाख्रिनलाई प्रदान गरिएको छ भने सबैभन्दा बढी रोयल्टी बुझाउने १० कम्पनीलाई पनि सम्मान गरिएको थियो ।