सशस्त्र प्रहरी क्लबका गोपीचन्द्र पार्की र धादिङकी सन्तोषी श्रेष्ठले दोस्रो संस्करणको वीर गणेशमान सिंह टेन के रोड रेस प्रतियोगिताको उपाधि जितेका छन् । शनिवार विहान काठमाडौंको दरबारमार्गमा आयोजित प्रतियोगितामा पुरुषतर्फ गोपी र महिलातर्फ सन्तोषी च्याम्पियन बनेका हुन् ।

दुबैले पहिलो संस्करणको पनि उपाधि जितेका थिए । १३ औं सागका स्वर्ण पदक जितेका गोपीले निर्धारित दुरी ३१ मिनेट ४४ दशमलब ४९ सेकेण्डमा पूरा गरे । उपाधिसँगै गोपीले ६० हजार नगद प्राप्त गरे । पुरुषतर्फ अनिस थापा मगर ३१ मिनेट ५०.४९ सेकेण्डको समयसहित दोस्रो भए ।

तीर्थ पुनले ३१ मिनेट ५६.३८ सेकेण्डको समय निकाल्दै तेस्रो भए । सागकी स्वर्णधारी सन्तोषीले निर्धारित दुरी ३७ मिनेट ५३ दशमलब ४४ सेकेण्डमा पूरा गरेर ६० हजार नगद प्राप्त गरिन् । महिलातर्फ नेपाल पुलिस क्लबकी राजपुरा पाछि ३९ मिनेट ३० सेकेण्डको समय निकाल्दै दोस्रो र एपीएफकी फुलमती राना ४० मिनेट ५६ सेकेण्डको समयसहित तेस्रो भईन् ।