जनता समाजवादी पार्टीका अध्यक्ष उपेन्द्र यादवले लुम्बिनी प्रदेशका चार जना प्रदेशसभा सदस्यलाई कारवाही गरेर प्रदेशसभा सदस्यबाट हटाएपछि अर्का अध्यक्ष महन्थ ठाकुर निर्वाचन आयोग पुगेका छन् ।

प्रदेशसभा सदस्यलाई हटाउने अधिकार पार्टी अध्यक्ष उपेन्द्र यादवलाई नरहेको भन्दै अध्यक्ष ठाकुरले आयोगको ध्यानाकर्षण गराएका हुन् । निर्वाचन आयोगले लुम्बिनी प्रदेशमा सांसदलाई पार्टीबाट निष्काशन गरेको विषयमा अध्यक्ष ठाकुरले ध्यानाकर्षण गराएको जानकारी दिएको छ ।

ठाकुरले ध्यानाकर्षण गराएपनि आयोगले तत्काल त्यसमा केही गर्न नसकिने जवाफ दिएको छ । ठाकुरले २०७७ पुस ७ गतेपछि जनता समाजवादी पार्टीको कार्यकारिणी समितिको बैठक नै नबसेको र बैठक बोलाउन कुनै सूचना पनि जारी नगरिएको बताएका छन् । पार्टीको बैठक नै नबसेको बेला लुम्बिनी प्रदेशसभा सचिवालयले जसपाका सांसदलाई पदबाट निष्काशन गरेको भनी जारी गरेको सूचना प्रथम दृष्टिमै अवैध र गैरकानुनी भएको समेत ठाकुरले जिकिर गरेका छन् ।