दुई गोलको स्पष्ट अग्रतालाई जोगाउन नसक्दा चितवन एफसी नेपाल सुपर लिग एनएसएलमा बुटवल लुम्बिनीसँग दुई दुई गोलको बराबरीमा रोकिएको छ । दशरथ रंगशालामा भएको खेलको १५ औ मिनेटमा चितवनले अग्रता बनायो। गोरान जार्कोभिचको पासमा जर्ज प्रिन्स कार्कीले छ यार्ड बक्सबाट उत्कृष्ट फिनिसिङमा गोल गरे र चितवनले पहिले अग्रता बनायो ।

यसको दुई मिनेटपछि नै बुटवललाई दोस्रो झट्का लाग्यो। खेलको १८ औ मिनेटमा सिमन्त थापाको क्रसमा टेक बहादुर बुढाथोकीले गोल गरे । यो गोलमा चितवनले अग्रता दुगुना गर्यो । दुई शुन्यले पछि परेको बुटवलकोलागि ३१ औ मिनेटमा आशिष लामाले गोल फर्काए र पहिलो हाफ चितवन पक्षमा दुई एकको नतिजा सकियो। यसपछि ६५ औ मिनेटमा बुटवलकोलागि लक्क्षमण रूचालले दोस्रो गोल गरे र खेल दुई दुईको बराबरीमा पुग्यो। यसपछि खेलमा थप गोल नहुदा सानदार कमब्याककासाथ बुटवलले चितवनसँग बराबरी गरेको हो ।