पाकिस्तानमा भएको बम बिस्फोटमा चार जनाको मृत्यु भएको छ । दक्षिण पश्चिम पाकिस्तानको क्वेटा शहरको एक होटलमा भएको विस्फोटमा परेर अन्य १२ जना घाइते भएको बीबीसीले जनाएको छ ।

पाकिस्तानका लागि चिनियाँ राजदूत नङ रङ रहेको होटलको कार पार्किङ क्षेत्रमा आक्रमण हुँदा विस्फोट भएको बताइएको छ । सो समयमा राजदूत नङ रङ भने अफगानिस्तानको सीमा नजिकैको बलूचिस्तान प्रान्तको भ्रमणमा रहेको गृह मन्त्रालयले जनाएको छ ।

यसैबीच विद्रोही समुह तालिवानका प्रवक्ताले एक विज्ञप्ती जारी गर्दै घटनामा आफुहरुको संलग्नता रहेको जनाएका छन् । बलुचिस्तानमा चिनियाँ लगानीका ठूला पूर्वाधारहरु निर्माण भइरहेका छन् । लामो समयदेखि पाकिस्तानमा सशस्त्र आन्दोलन गरीरहेका विद्रोहीहरुले चीनको लगानीमा सञ्चालित आयोजनाहरुको विरोध गर्दै आएका छन् ।राजदूत रङ सोही आयोजनाहरुको निरीक्षणका लागि क्वेटा शहरको भ्रमणमा गएको अधिकारीहरुले जनाएका छन् ।