काठमाडौं । हालैको आन्दोलनका क्रममा सिंहदरबार परिसरभित्र विभिन्न मन्त्रालयमा भएको तोडफोड र आगजनीपछि शिक्षा मन्त्रालयले सरसफाइ कार्य सुरु गरेको छ ।

मन्त्रालयका कर्मचारीहरू अहिले जलेका तथा टुटफुट भएका सामग्री हटाउने, बढारकुडार गर्ने र क्षति मूल्याङ्कन गर्ने कार्यमा व्यस्त छन् । मन्त्रालयका अधिकारीहरूका अनुसार छिट्टै मर्मत–सम्भार गरेर पुनः सेवा सञ्चालन गर्ने तयारी गरिएको छ ।

शिक्षा मन्त्रालयले फिलहाल दुई ठाउँबाट सेवा दिने जनाएको छ । सचिव चूडामणि पौडेलका अनुसार सिंहदरबारमा सरसफाइ भइरहेको छ भने केही महाशाखा वा शाखाको काम लैनचौरस्थित केशरमहलबाट पनि प्रवाह गरिनेछ ।

भदौ २३ गतेदेखि सुरु भएको जेनजी युवाको आन्दोलनअन्तर्गत भदौ २४ गते सिंहदरबारको मुख्य भवन, संसद भवन, सर्वोच्च अदालत, विशेष अदालत, जिल्ला अदालतलगायत स्थानमा तोडफोड र आगजनी भएको थियो । यस क्रममा शिक्षा मन्त्रालयका कोठा र काठका भर्‍याङ जलेका थिए भने कर्मचारीका कार्यकक्षमा पनि ठूलो क्षति भएको छ ।

हाल सिंहदरबारको भवन प्रयोग गर्न नसकिने भएकाले शिक्षा मन्त्रालयले अस्थायी रूपमा केशरमहलस्थित सार्वजनिक खरिद अनुगमन कार्यालयको भवन प्रयोग गर्ने तयारी गरेको छ । तर, त्यहाँ स्थान अपुग भएकाले सार्वजनिक खरिद अनुगमन कार्यालयलाई अन्यत्र सारेर भए पनि मन्त्रालयलाई राख्ने तयारी भइरहेको मन्त्रालयका अधिकारीहरूले जनाएका छन् ।