इटहरी । नेवारी समुदायको भाषा सस्कार र संस्कृतिहरुको जर्गेनामा जोड दिदै स्थापना गरिएको मिसा पुचः इटहरीले विभिन्न कार्यक्रमको आयोजना गरि आफनो २५औ स्थापना दिवस मनाएको छ ।

नेवारी समुदायका महिलाको संस्था मिसा पुचः इटहरीले २५औं वार्षिक उत्सव तथा रजत जयन्तीको अवसर पारेर सम्मान , अन्तरक्रिया र दन्तचिकित्सक परामर्श कार्यक्रम आयोजना गरि मनाएको हो । मिसा पुच इटहरीकी अध्यक्ष गंगा श्रेष्ठको अध्यक्षता तथा नेवा दे दवुकी केन्द्रीय सदस्य विमला प्रधानको प्रमुख आतिथ्य रहेको कार्यक्रम जेष्ठ नागरिक कृष्णकुमारी मकाजु , सस्थापक उपाध्यक्ष शोभा ताम्राकार , वरिष्ठ उपाध्यक्ष कौशल्या श्रेष्ठ , सस्थापकहरु भारती श्रेष्ठ , विमला प्रधान लगायतलाई सम्मान गरियो ।

इटहरी उपमहानगरपालिका वडा नम्बर ९मा रहेको नेवा भवनको सभाहलमा आयोजना गरिएको कार्यक्रममा दन्तचिकित्सकहरुले दाँत सम्वन्धी विभिन्न परामर्श दिएका थिए । इटहरी क्षेत्रमा वसोवास गर्ने नेवारी समुदायका महिलाहरुलाई एकीकृत गरेर आफनो जातिय भाषा,भेषभुषा सहित सस्कार र संस्कृति जर्गेना गर्ने उद्धेश्यले स्थापना गरिएको मिसा पुचले युवाहरुलाई समेत आफना सस्कार संस्कृति जर्गेनामा सहभागिता गराउदै आएको कार्यक्रमकी अध्यक्ष समेत रहेकी मिसा पुच इटहरीकी अध्यक्ष गंगा श्रेष्ठले जानकारी दिइन ।

मिसा पुच इटहरीकी वरिष्ठ उपाध्यक्ष कौशल्या श्रेष्ठको संयोजकत्वमा भएको कार्यक्रममा नेवा पुच इटहरीका अध्यक्ष कालिदास श्रेष्ठ , नेपा वहुउद्देश्य सहकारी संस्थाका अध्यक्ष जितेन्द्रकुमार श्रेष्ठ लगायतको आतिथ्य रहेको थियो ।