ललितपुरको पुल्चोकमा रहेको करिव २०८ वर्ष पुरानो ऐतिहासिक सम्पदा समय फल्चा पाटीको पुनर्निर्माण गरिएको छ । २०६५ सालमा सर्वोच्च अदालतले पुनर्निर्माणको काम गर्न आदेश दिँदा पनि बन्न नसकेको सो सम्पदाको पुनर्निर्माणको काम अहिले आएर सम्पन्न गरिएको ललितपुर महानगरपालिकाका प्रमुख चिरिबाबु महर्जनले जानकारी दिए ।

पाटी नबनाउन माग गर्दै लालीगुराँस बहुउद्देश्यीय सहकारी संस्थाले जिल्ला अदालत पाटनमा मुद्धा हालेको थियो । मुद्दा परेसँगै पाटी नबन्ने होकी भन्ने पुल्चोकवासीले चिन्ता व्यक्त गरेका थिए । अन्तिममा उच्च अदालत पाटनले पाटी बनाउन पाउने गरी फैसला गरेपछि पुल्चोकका सम्पदाप्रेमी खुशी भएका थिए । सम्पदाको संरक्षण गर्ने विषयलाई मुद्धा मामिला बनाइएकाले यसको पुनर्निर्माणको काममा ढिलाई हुन गएको ललितपुर महानगरपालिकाले जनाएको छ ।