-
इटहरी । उद्योग वाणिज्य संघ इटहरीको आगामी असार २७ गते हुने निर्वाचनको माहोल तातिँदै जाँदा साझा समूहबाट वाणिज्य सदस्य पदका उम्मेदवार महेश थापा व्यवसायीमाझ सक्रिय चुनावी अभियानमा जुटेका छन्। विगत १७ वर्षदेखि इटहरीमा आयुर्वेद व्यवसायमार्फत सेवा दिँदै आएका थापा व्यवसायिक अनुभव, सामाजिक सक्रियता र युवा उद्यमीको प्रतिनिधित्व गर्ने उम्मेदवारका रूपमा चर्चामा छन्।
होम्ताङ आयुर्वेद उपचार क्लिनिकका सञ्चालक रहेका थापा हाल नेपाल आयुर्वेद स्वास्थ्यकर्मी समाजका केन्द्रीय वरिष्ठ उपाध्यक्षसमेत हुन्। आयुर्वेद स्वास्थ्य सेवा, सामाजिक उत्तरदायित्व र व्यवसायिक संगठनमा लामो समयदेखि सक्रिय रहँदै आएका उनले उद्योगी–व्यवसायीका साझा मुद्दालाई प्राथमिकतामा राखेर उम्मेदवारी दिएको बताएका छन्।
थापाले उद्योग वाणिज्य संघलाई सबै व्यवसायीको साझा संस्था बनाउँदै नयाँ पुस्ताका उद्यमीलाई नेतृत्वसँग जोड्ने, साना तथा मझौला व्यवसायीका समस्या समाधानका लागि संघका टिमले प्रभावकारी पहल गर्ने र व्यवसायमैत्री वातावरण निर्माणमा आफू प्रतिबद्ध रहने बताएका छन्। उनले विशेषगरी युवा उद्यमीलाई व्यवसाय विस्तार, सीप विकास र प्रविधिमैत्री व्यापार प्रणालीमा जोड्ने योजना सार्वजनिक गरेका छन्।
उनले सम्पूर्ण उद्योगी तथा व्यवसायीलाई साझा समूहका अध्यक्ष पदका उम्मेदवार नवराज काफ्लेसहित सम्पूर्ण प्यानललाई अत्यधिक मतका साथ विजयी गराउन आग्रह गरेका छन्। साझा समूहले अनुभव, पारदर्शिता र व्यवसायीको हितलाई केन्द्रमा राखेर चुनावी अभियान सञ्चालन गरिरहेको जनाएको छ।
इटहरी उद्योग वाणिज्य संघको निर्वाचन यही असार २७ गते हुँदैछ। यस निर्वाचनलाई व्यवसायीहरूले आगामी नेतृत्व चयनका लागि महत्त्वपूर्ण अवसरका रूपमा लिएका छन्। चुनावी मैदानमा रहेका उम्मेदवारहरूले व्यवसायीका समस्या समाधान, लगानीमैत्री वातावरण, उद्यमशीलताको प्रवर्द्धन र संघलाई थप प्रभावकारी बनाउने प्रतिबद्धता व्यक्त गर्दै मतदातासँग घरदैलो तथा भेटघाट अभियानलाई तीव्र बनाएका छन्।
व्यवसायिक अनुभव, सामाजिक नेतृत्व र युवाको उत्साहलाई समेट्दै अघि बढेका महेश थापाले आफूलाई सम्पूर्ण व्यवसायीको साझा प्रतिनिधिका रूपमा स्थापित गर्ने विश्वास व्यक्त गरेका छन्। निर्वाचनको अन्तिम चरणमा पुगेको प्रचारप्रसारसँगै इटहरीका उद्योगी तथा व्यवसायीबीच चुनावी उत्साह पनि दिनप्रतिदिन बढ्दै गएको छ।
सम्बन्धित शीर्षकहरु
