इटहरी । अहमदिया संघ नेपाल, सुनसरी–मोरङको आयोजनामा निःसहाय बालबालिका सेवा आश्रममा आश्रित बालबालिकाहरूलाई लक्षित गर्दै भोजन वितरण कार्यक्रम सम्पन्न गरिएको छ ।
‘सबैलाई माया गरौँ, कसैलाई घृणा नगरौँ’ भन्ने सन्देश सहित आयोजित उक्त कार्यक्रम मार्फत संघले सामाजिक उत्तरदायित्वलाई व्यवहारमा उतारेको जनाएको छ ।
कार्यक्रममा आश्रममा आश्रित बालबालिकाहरूलाई पौष्टिक तथा स्वादिष्ट भोजन वितरण गरिएको थियो । विशेषगरी बिरयानी र विभिन्न मिठा परिकारहरू समावेश गरी सामूहिक भोजनको गराएको थियो। एकै स्थानमा बसेर भोजन गर्दा बालबालिकाहरू उत्साहित र खुशी देखिएका थिए। आयोजकका अनुसार यस्ता कार्यक्रमले बालबालिकामा अपनत्व र आत्मीयता बढाउन मद्दत पुग्ने विश्वास गरिएको छ।

अहमदिया संघ नेपालका केन्द्रीय उपाध्यक्ष मोहम्मद स्माइलले यस्ता सामाजिक गतिविधिले समाजमा सकारात्मक सन्देश प्रवाह गर्नुका साथै सहयोग र सहकार्यको संस्कार विकास गर्न महत्वपूर्ण भूमिका खेल्ने बताए।

उनले मानव सेवा नै सबैभन्दा ठूलो धर्म भएको उल्लेख गर्दै आगामी दिनमा पनि यस्ता कार्यक्रमलाई निरन्तरता दिइने जानकारी दिए ।

यसैगरी, आश्रमकी संस्थापक सुश्री गीता गौतमले बालबालिकाको हितका लागि गरिएको सहयोगप्रति आभार व्यक्त गर्दै यस्ता पहलले उनीहरूको मनोबल बढाउने बताइन्।
कार्यक्रममा अहमदिया संघ नेपालका केन्द्रिय सदस्य हैदर मियाँ, अहमदिया संघ नेपाल सुनसरी–मोरङ इन्चार्ज सेराज अहमद लगायतको सहभागिता रहेको थियो ।