-
सुनसरी । मधेश प्रदेशका पूर्वप्रदेश प्रमुख राजेश अहिराजलाई बलात्कार आरोपमा पुर्पक्षका लागि थुनामा पठाइएको छ। काठमाडौं जिल्ला अदालतका न्यायाधीश पिताम्बर शर्माको इजलासले उनलाई पुर्पक्षका लागि थुनामा पठाउने आदेश दिएको हो।
अहिराजमाथि एक महिलाले ४ जेठ २०८१ मा काठमाडौंको नयाँ बानेश्वरस्थित डेरामा बलात्कार गरेको आरोप लगाएकी थिइन्। सोही उजुरीका आधारमा ४ साउनमा प्रहरीले उनलाई पक्राउ गरेको थियो। अनुसन्धानपछि काठमाडौं सरकारी वकिलको कार्यालयले जिल्ला अदालतमा मुद्दा दायर गरेको थियो।
अदालतले पुर्पक्ष थुनाको आदेश दिएपछि अहिराजलाई डिल्लीबजार कारागारमा चलान गरिएको छ।
यसबीच, अहिराजले पनि आफूमाथि उजुरी दिने ती युवतीविरुद्ध बदनियतपूर्वक झुटो आरोप लगाएको भन्दै कानुनी कदम चालेका छन्।
पूर्वप्रदेश प्रमुख जस्तो गरिमामय पदमा रहेका व्यक्तिमाथि गम्भीर प्रकृतिको अभियोग लाग्नुका साथै दुबै पक्षबाट कानुनी प्रक्रिया अघि बढेसँगै घटनाले चासो बढाएको छ।
