प्रतिनिधि सभाबाट एमसीसी पारित भएसँगै पार्टी नेतृत्वप्रति असन्तुष्ट रहेका नेकपा माओवादी केन्द्रका नेता नारायणकाजी श्रेष्ठलाई नेकपाका महासचिव नेत्रविक्रम चन्दले भेटेका छन् । श्रेष्ठको हात्तीवनस्थित निवासमा भएको भेटमा चन्दले एमसीसी अनुमोदन राष्ट्रहित विपरीत गरिएको भन्दै एकता र सहकार्य गर्नुपर्ने प्रस्ताव गरेको बताइन्छ ।

माओवादीमा श्रेष्ठले एमसीसी अनुमोदनकै विषयलाई लिए पार्टी विभाजन वा परित्याग गर्नसक्ने चर्चा चलेको छ । यस्तो बेला श्रेष्ठ र चन्दबीचको भेटलाई अर्थपूर्णरूपमा लिइएको छ । सोमबार आयोजित पत्रकार सम्मेलनमा माओवादी अध्यक्ष पुष्पकमल दाहालले नारायणकाजीले पार्टी छाडे पनि फरक नपर्ने आशयको अभिव्यक्ति दिएका थिए । त्यसको भोलिपल्ट श्रेष्ठलाई सम्झाउन दाहाल आफै हात्तीवन पुगेका थिए ।