अमेरिकाले तेलको विश्वव्यापी मूल्य वृद्धिलाई नियन्त्रण गर्न आपूर्ति बढाउने भएको छ । राष्ट्रपति जो बाइडेनले आफ्नो रणनीतिक तेल भण्डारणबाट ५ करोड ब्यारेल कच्चा तेल निकालेर बढ्दो मूल्य नियन्त्रण गर्न आदेश दिएका छन् ।

इन्धन खपत गर्ने मूख्य देशहरु चीन, भारत, बेलायत, जापान र दक्षिण कोरियासंगको समन्वयमा बाइडेनले यस्तो आदेश दिएका हुन् । यो कदमले इन्धनको मूल्यवृद्धि नियन्त्रण गर्न मद्धत पुग्ने विश्वास बाइडेनले लिएका छन् । उपभोक्ताले बढ्दो मूल्यका कारण पीडा महसुश गरेको भन्दै ह्वाइट हाउसका प्रवक्ताले आगामी डिसेम्बर मध्यसम्ममा भण्डारणबाट कच्चा तेल निकालेपछि राहत मिल्ने बताएका छन् ।

अमेरिकाले राष्ट्रिय सुरक्षाका बेला प्रयोग गर्ने गरी टेक्सस र लुजियाना राज्यमा रहेको आकस्मिक तेल भण्डारमा ७० करोड ब्यारेलभन्दा बढी तेल रहेको अनुमान छ ।