संयुक्त राष्ट्रसंघका महासचिव एन्टोनियो गुटरेसले राष्ट्रसंघले अफगानिस्तानको समस्या समाधान गर्न सक्छ भनेर सोच्नु ‘एउटा कल्पना’ मात्र भएको बताएका छन् । समाचार एजेन्सी रोयटर्ससँगको कुराकानीका क्रममा अमेरिकासहित अन्य विभिन्न देशले गरेका प्रयास र खर्चको उदाहरण दिँदै गुटरेसले राष्ट्रसंघ एक्लैले केही गर्न नसक्ने बताएका हुन ।

तालिबान सरकारलाई समावेशी बनाउनका लागि मध्यस्थता गर्ने क्षमता राष्ट्र संघसँग सीमित मात्र रहेको बताएका हुन । अफगानिस्तानको अवस्था सुधार्न राष्ट्रसंघले दबाब महसुस नगरेको र सक्दो प्रयास गरिरहेको उनको भनाइ थियो । मानवीय मद्दतका लागि राष्ट्र संघले सक्दो प्रयास भने गर्ने गुटरेसले स्पष्ट पारे । तालिबानबाट विदेशी सेना स्वदेश फिर्ता भएको एक महिनापछि राष्ट्रसंघ महासचिवको प्रतिक्रिया आएको हो ।