तालिबान बिद्रोहीले अफगानिस्तानको दोस्रो ठूलो सहर कान्दाहारमा पनि कब्जा जमाएका छन । तालिबानले कान्दाहार कब्जा गरेको घोषणा गरे पनि त्यसको पुष्टि भने भने हुन बाँकी छ । मुलुकको व्यापारिक केन्द्र कान्दाहारमाथि कब्जा गर्नुलाई तालिबानले ठूलो उपलब्धिको रुपमा लिएका छन ।

रणनीतिक महत्वको शहर कान्दहारमा अन्तर्राष्ट्रिय विमानस्थल समेत रहेको छ । बिहीबार तालिबानले मुख्य सहरहरू गज्नी र हेरातमाथि नियन्त्रण कायम गरेको दाबी गरेको थियो । दक्षिणी हेल्मन्ड प्रान्तको राजधानी लश्कर गाहलाई पनि तालिबानले नियन्त्रणमा लिएको बताइएको छ । पछिल्लो समय तालिबान लडाकु राजधानी काबुलतर्फ अगाडि बढ्न थालेको छ । तालिबान आक्रमक रूपमा अघि बढ्न थालेपछि धेरैले चिन्ता प्रकट गरेका छन् । तालिबानले हालसम्म देशको एक तिहाइ भू–भागमा आफ्नो नियन्त्रण कायम गरेको बताइएको छ ।

अमेरिकी नेतृत्वको विदेशी सेनाले २० वर्षको सैन्य अभियान अन्त्य गरे लगत्तै अफगानिस्तानमा हिंसा चर्केको छ । अफगानिस्तानमा सरकारी वार्ता टोलीले तालिवानसँग सत्ता साझेदारीको प्रस्ताव गरेको छ । शान्ति स्थापनाका लागि सरकारले तालिवान समूहलाई सत्ता साझेदारीको प्रस्ताव गरेको हो । दोहामा भएको एउटा वार्तापछि अमेरिका, रुस र चीनसहित विश्व शक्ति राष्ट्रहरूले सशस्त्र गतिविधिबाट काबुलको सत्तामा आउने कुनै पनि शक्तिलाई आफूहरूले मान्यता नदिने जनाएका छन । उनीहरूले अफगानिस्तानमा शान्ति प्रक्रियालाई तीव्र बनाउन आह्वान गरेका छन ।