अफगानिस्तानका तालिबान विद्रोहीले सरकारको सञ्चार तथा सूचना केन्द्रका निर्देशकको हत्या गरेका छन् । तालिबानीहरुले शुक्रबार निर्देशक दावा खानको राजधानी काबुलमा आक्रमण गरेका हुन् । टोलो न्युजका अनुसार दारुल अमान सडकमा बन्दुकधारीहरुले उनीमाथि गोली हानेका छन् ।

पछिल्लो समय तालिवानले अफगान सरकारका उच्च अधिकारीहरुलाई निशाना बनाइरहेको छ । यसअघि बुधबार तालिवानले अफगानिस्तानका रक्षामन्त्रीको काबुलस्थित घरमा पनि आक्रमण गरेको थियो । तालिवानी लडाकुहरुले मुलुकका दुर्गम क्षेत्रमा रहेका भूभागहरु कब्जा गरेपछि अहिले प्रमुख शहरमा आक्रमण गरिरहेका छन् ।

उनीहरुले दक्षिणतर्फको कन्दहर शहर, आर्थिक रुपमा महत्वपूर्ण मानिएको हेरात र हेल्मन्ड प्रान्तको राजधानी लस्कर गाहमा आक्रमण गरिरहेका छन् । यसैबीच अफगानिस्तानको आन्तरिक मन्त्रालयका प्रवक्ताले तालिबानी आतंककारीहरुले पुनः एकपटक कायरतापूर्ण कार्य गरेको र राष्ट्रवादी अफगानीले सहादत प्राप्त गर्नु परेको प्रतिक्रिया दिएका छन् । संयुक्त राष्ट्रसंघीय सुरक्षा परिषद्ले पनि अफगानिस्तानको बिग्रँदो अवस्थाबारे खुला छलफल गर्नका लागि शुक्रबार नै बैठक बोलाएको छ ।