जर्मनीमा दशकौंयताको भीषण बाढीमा परेर कम्तिमा ९३ जनाको मृत्यु भएको छ । हजारौं बेपत्ता छन् । युरोपमा अति वर्षा भएपछि नदीहरूको सतह बढ्दा आसपासका क्षेत्रमा बाढीले वितण्डा मच्चाएको हो । बेल्जियममा पनि कम्तिमा १२ जनाको मृत्यु भएको बताइएको छ ।

फ्रान्स, नेदरल्याण्ड, स्वीजरल्याण्ड र लग्जेम्बर समेत बाढीका कारण प्रभावित बनेका छन् । जर्मनीको अर्विलर जिल्लामा कम्तिमा १३ सयजना वेपत्ता भएको यहाँको स्थानीय सरकारका प्रवक्ताले जनाएका छन् । बाढीका कारण मोबाइल नेटवर्कले काम नगरेको र स्थानीयसँग सम्पर्क गर्न नसकिएको उनले बताएका छन् ।

झन्डै ७ सय जनसंख्या बसोबास रहेको सेहुल्ड गाउँ पुरै ध्वस्त भएको थियो । जर्मन चान्सेलर एन्जेला मर्केलले जलवायु परिवर्तनका कारण बाढिको प्रकोप भएको भन्दै पीडितहरुलाई पूर्ण सहयोग गर्न आग्रह गरेकी छिन् । जर्मनीको राइनल्याण्ड–प्यालाटिनेट र उत्तर राइन वेस्टफेलियामा सबैभन्दा बढी क्षति पुगेको छ ।