बंगलादेशको एउटा खाद्यान्न प्रशोधन कारखानामा आगलागी हुँदा कम्तीमा ५२ जनाको मृत्यु भएको छ । घटनामा परी अरू ३० भन्दा बढी घाइते भएको र उनीहरूको विभिन्न अस्पतालमा उपचार भइरहेको बंगलादेशको प्रहरीले जनाएको छ । उनीहरूमध्ये केहीको अवस्था गम्भीर रहेको पनि बताइएको छ ।

प्रहरीले घटनास्थलमा अरू पनि परेको हुन सक्ने भएकाले खोजी तथा उद्धार कार्य जारी नै राखेको छ । मृतकको संख्या अझै बढ्न सक्ने अनुमान पनि प्रहरीले गरेको छ । सुरक्षित नै मानिएको बंगलादेशको औद्योगिक क्षेत्रमा रहेको उद्योगको भवनमा आगलागी भएको जनाइएको छ । बंगलादेशको रुपगञ्जमा रहेको हाशेम फुड एण्ड बेभरेज कारखानामा भएको हो ।

घटनास्थल ढाका शहरभन्दा बाहिर औद्योगिक क्षेत्रमा पर्दछ । कतिपय व्यक्ति भने आगलागी भएपछि भवनबाट बाहिर हाम फालेको र हाम फालेका मध्ये पनि केहीको मृत्यु भएको र केही घाइते भएको पनि प्रहरीले जनाएको छ । औद्योगिक क्षेत्रमा रहेको उक्त कारखानामा लागेको आगो अझै निभिसकेको छैन ।