उत्तर कोरियाका नेता किम जोङ्ग–उनले आफ्नो देशमा खाद्य संकट रहेको औपचारिक रुपमा स्वीकार गरेका छन् । शीर्ष नेताहरुको बैठकलाई सम्बोधन गर्दै नेता किमले देशको खाद्य अवस्था तनावपूर्ण बन्दै गएको बताएका हुन् ।

कृषि क्षेत्रले देशको माग धान्न नसकेको उनले उल्लेख गरेका छन् । गत वर्षको बाढीले खेतीपातीमा क्षति भएकाले माग अनुसारको उत्पादन हुन नसकेको उनले उल्लेख गरेका छन् । उत्तर कोरियामा खाद्यान्नको मूल्य निकै बढेको खबर आइरहेका छन् । एनके न्यूजले एक किलो केराको मूल्य ४५ अमेरिकी डलरसम्म पुगेको खबर छापेको थियो ।

उत्तर कोरियाले कोरोना भाइरसको संक्रमण नियन्त्रणमा लिने भन्दै आफ्नो सीमा बन्द गरेको छ । जसका कारण चीनसँगको उसको व्यापारिक गतिविधि ठप्प छ । खाद्यान्न, मलखाद तथा उर्जाका लागि उत्तर कोरिया चीनमा निर्भर रहँदै आएको छ । यस्तै उसको परमाणु कार्यक्रमका कारण लागेको अन्तर्राष्ट्रिय प्रतिबन्धका कारण पनि उत्तर कोरिया समस्यामा छ । सत्तारुढ वर्कर्स पार्टीको केन्द्रीय समिति बैठकमा नेता किमले देशको खाद्य अवस्थाबारे बोलेका हुन् । यो हप्ता राजधानी प्योङ्याङ्गमा बैठक सुरु भएको हो ।