अमेरिकाले विश्वका कम आय भएका ९२ देशलाई कोरोना भाइरसविरुद्धको ५० करोड मात्रा खोप आफै किनेर वितरण गर्ने भएको छ । राष्ट्रपति जो बाइडेनको प्रशासनले ५० करोड मात्रा फाइजरको खोप अबको दुई वर्षभित्र विश्वका विभिन्न देशलाई उपलब्ध गराउने तयारी गरेको सञ्चारमाध्यमहरुले जनाएका छन् ।

त्यसमध्ये यो वर्ष २० करोड मात्रा र बाँकी मात्रा सन् २०२२ मा वितरण गर्ने तयारी अमेरिकाले गरेको बताइएको छ । तथापी खोप वितरण गर्ने योजनाबारे राष्ट्रपति कार्यालय ह्वाइट हाउसले औपचारिक रुपमा जानकारी भने दिन बाँकी नै छ । विश्वका गरिब देशहरुलाई प्रदान गर्ने खोपको मात्रा बढाउन अमेरिकामाथि दबाब पर्दै आएको छ ।

सत्तामा आएपछिको पहिलो विदेश भ्रमणका क्रममा राष्ट्रपति बाइडेन बुधवार बेलायत पुगेपछि अमेरिकाको खोप सम्बन्धी नयाँ तयारीबारे जानकारी आएको हो । उनले बुधवार नै आरएएफ मिल्डेनहलमा रहेको एयरवेसमा अमेरिकी सैनिलाई सम्बोधन गरेका थिए । बाइडेन विकसित देशहरुको समूह जी सेभेनको सम्मेलनमा सहभागी हुन बेलायत पुगेका हुन् ।