रुसमा एक विद्यालयमा गोली चल्दा सात बालबालिका र शिक्षक गरी कम्तीमा नौ जनाको मृत्यु भएको छ । घटनामा अन्य २० जनाभन्दा धेरै घाइते भएका बीबीसीले जनाएको छ ।

राजधानी मस्को भन्दा आठ सय २० किलोमिटर पूर्वमा रहेको काजन सहरमा यो घटना भएको हो । विद्यालयमा भएको गोली प्रहारको घटनाप्रति दुःख व्यक्त गर्दै रुसका राष्ट्रपति भ्लादिमिर पुटिनले बन्दुकसम्बन्धी कानुनको समीक्षा गर्ने बताएकाछन् ।

विद्यालयमा गोली चल्दा बालबालिकामा भागदौड मच्चिएको थियो । केही बालबालिका झ्यालबाट हाम फाल्दा पनि ज्यान गएको छ । गोली चलाउने दुई जना बन्दुकधारीमध्ये एक जना सुरक्षा कारबाहीमा मारिएको बीबीसीले जनाएको छ । घटनाबारेमा अनुसन्धान भइरहेको पनि राष्ट्रपति पुटिनले बताए ।