नेपाल खनाल समूहले अध्यक्ष ओलीले अनधिकृत ढंगले पार्टी निर्णय गरेको भन्दै सर्वोच्च अदालतमा पुगेको छ । खनाल–नेपाल समूहले पार्टी अध्यक्ष ओली र महासचिव ईश्वर पोखरेललाई विपक्षी बनाएर मुद्दा अदालतमा बुझाएका छन् । मुद्दा भने दर्ता भइसकेको छैन ।

बुधबार ढिला गरेर रिट दर्ता हुन आएकाले नभ्याइएको बताइएको छ । खनाल–नेपाल पक्षबाट वरिष्ठ अधिवक्ता गोविन्द बन्दी, अधिवक्ता टिकाराम भट्टराई र शम्भु थापा लगायतका कानुन व्यवसायी सर्वोच्च पुगेर वारेसनामामार्फत अध्यक्ष ओली, महासचिव पोखरेल, निर्वाचन आयोग र सभामुखलाई विपक्षी बनाएर रिट निवेदन दर्ता गर्न सर्वोच्च पुगेका थिए ।

रिट निवेदनमा ओलीले गैरकानुनी रुपमा गरेका निर्णय कार्यान्वयन नगर्न र आफूहरु माथिको कारवाही रोक्न माग गर्नुका साथै उत्प्रेषण र प्रतिषेधको आदेश माग गरिएको छ । रिटमा पार्टीका अध्यक्षले सोधेको स्पष्टीकरण र तत्पश्चात् गरिएको कारबाही पत्र पार्टीको विधानविपरीत रहेको दाबी गरिएको छ । त्यस्तै, फागुन २८ गते गरिएको बैठक र त्यसका निर्णयहरु नवौँ राष्ट्रिय महाधिवेशनबाट पारित पार्टी विधानको बर्खिलापमा रहेको पनि रिटमा उल्लेख छ ।