भारतमा कक्षा दशको वार्षिक परीक्षा स्थगित गरिएको छ । मुलुकभर कोरोना भाइरसको संक्रमण तीव्र गतिमा वृद्धि भएको कारण देखाउँदै काउन्सिल फर इन्डियन स्कूल सर्टिफिकेट इग्जामिनेशन सीआईएससीईले १० कक्षाको राष्ट्रिय तहमा हुने परीक्षा रद्द गर्ने निर्णय गरेको हो ।

सीआईएससीईले जारी गरेको वक्तव्यमा कोरोना भाइरस महामारीको बिग्रँदो अवस्थालाई मध्यनजर गरेर आईसीएसई अर्थात कक्षा १० को परीक्षा रद्द गर्ने निर्णय लिइएको उल्लेख छ । बोर्डले विद्यार्थी तथा शिक्षकको सुरक्षालाई प्राथमिकतामा राखेर कक्षा १० को परीक्षा कार्यक्रम तत्कालका लागि रोक्ने निर्णय लिइएको हो ।

यसैबीच सीआईएससीईले विद्यालयहरुलाई कक्षा ११ को भर्ना प्रक्रिया भनें सुरु गर्न भनेको छ । कक्षा १० को नतिजाका लागि ‘सही र निष्पक्ष’ तरिका अपनाउने र निश्चित गरिएको मितिमै नतिजा सार्वजनिक गरिने भएकाले कक्षा ११ को भर्ना प्रक्रिया सुरु गर्न सुझाएको हो । कक्षा १२ को परीक्षा भने तोकिएकै मितिमा हुने भनिएको छ ।