कोरोना भाइरसको सङ्क्रमण तीव्र गतिमा फैलिएपछि भारतको महाराष्ट्र राज्यमा आजदेखि कडा प्रतिबन्धात्मक व्यवस्थाहरू लागु गरिएको छ । महाराष्ट्रमा आजदेखि स्थानीय समय अनुसार रातको आठ बजेदेखि बिहानको सात बजेसम्म कर्फ्यु लागु हुनेछ । त्यसैगरी, सप्ताहान्तमा शुक्रवार राती आठ बजेदेखि सोमवार बिहान सात बजेसम्म पूर्ण रूपमा लकडाउन लागु हुनेछ ।

लकडाउनको अवधिमा अत्यावश्यक सेवा मात्र सञ्चालनमा रहने बताइएको छ । सो अवधिमा सार्वजनिक सवारी साधनहरू सञ्चालनमा भने प्रतिवन्ध लगाइएको छ । त्यसैगरी पसल, बार अनि रेष्टुराँले ग्राहकले किनेर लैजान सक्ने वा घर–घरमा खाना पु¥याउने कार्य भने जारी राख्न पाउनेछन् । यी प्रावधान अप्रिल ३० तारिखसम्म लागु हुने सरकारले जनाएको छ ।

सरकारी कार्यालयहरूमा ५० प्रतिशत कर्मचारीहरूलाई मात्रै बोलाउन र सकेसम्म घरबाटै काम गराउन भनिएको छ । भारतमा आइतवार एकैदिन ९३,२४९ सयभन्दा बढी सङ्क्रमित थपिएका थिए जुन गत सेप्टेम्बर महिनायताकै सर्वाधिक सङ्ख्या हो । उक्त सङ्ख्याको आधा भन्दा बढी संक्रमित महाराष्ट्र राज्यमा भेटिएका हुन् । भारतमा कोभिड–१९ का कारण हालसम्म करिब १ लाख ६५ हजारभन्दा बढीले ज्यान गुमाएका छन् । अहिलेसम्म सङ्क्रमित पुष्टि हुनेको सङ्ख्या १ करोड २५ लाख नाघेको छ ।