चाँगुनारायण नगरपालिकाले निर्माण गर्न लागेको खेल मैदानमा निर्माण कम्पनीले मापदण्ड विपरित बालुवा उत्खनन गरिरहेको पाइएको छ । निर्माण कम्पनी आगन्जा कन्स्ट्रक्सन प्रालिले नगरपालिकासँग भएको सम्झौता वितरित जमिनको तहभन्दा करिब २५-३० फिट तल गएर बालुवा उत्खनन गरेको हो ।

करिब ९३ रोपनी क्षेत्रफलमा निर्माण हुन लागेको खेल मैदान २०७९ जेठ मसान्तसम्ममा निर्माण सम्पन्न गर्नेगरी २०७७ असार १७ गते आगन्जासँग सम्झौता भएको थियो । सम्झौता अनुसार निर्माण कम्पनीले जमिनको लेबलसम्म सम्याउने र त्यस क्रममा निस्किने माटो, बालुवा तथा अन्य निर्माण जन्य सामाग्रीको उत्खनन् र बिक्रिवितरण गर्न पाउने गरी ८ करोड ६४ लाख रुपैयाँमा जिम्मा पाएको थियो । तर, नगरपालिकासँग भएको सम्झौता विपरित निर्माण कम्पनीले बालुवा उत्खनन् गरिरहेको स्थानीयले बताएका छन् ।

चाँगुनारायण नगरपालिकाले पनि निर्माण कम्पनी आगन्जाले यसअघि पनि बारम्बार मापदण्ड विपरित बालुवा उत्खनन् गरि बिक्री गर्दै आएको स्वीकार गरेको छ । नगरपालिकाकाले एक महिना अघि पनि जिल्ला प्रसासन कार्यलय, भक्तपुर मार्फत उक्त कार्य रोक्न निर्देशन दिएको जनाएको छ । सम्झौता भन्दा बाहेक गरिएका कार्य गैरकानूनी भएको भन्दै उक्त कार्य तत्काल रोक लगाउने समेत नगरपालिकाको भनाई छ ।

बिहीबार बिहान पनि ठेकेदार कम्पनीले करिब १० ठाउँमा जमिन भन्दा २५-३० फिट मुनी गएर बालुवा उत्खनन् गरिरहेको थियो । तर स्थानीयको कडा विरोध पछि तत्काल ती स्थानमा डोजर लगाएर सम्याउने काम भएको थियो ।