म्यानमारमा सैन्य सरकारविरुद्ध भएको प्रदर्शनकारीमाथि चरम दमन भएको छ । शनिबार भएको प्रदर्शनमा कम्तिमा ५० जनाले ज्यान गुमाएका छन् । म्यानमारको साङगिङ क्षेत्रको तान्त्से शहरमा हजारौँको संख्यामा प्रदर्शनकारीहरु सडकमा निस्किएका थिए । प्रदर्शनकारीमाथि प्रहरीले अन्धाधुन्ध गोली प्रहार भएको छ ।

त्यसैगरी म्यानमारको दोस्रो शहर मण्डालेमा पनि वृहत प्रदर्शन भएको छ । यसैबीच म्यानमारका सैनिक प्रमुखले प्रजातन्त्र सुरक्षित रुपमा पुनस्र्थापित गर्ने वाचा गरेका छन । सैन्य प्रमुख जनरल मिन आङ लाइङले शनिबार राष्ट्रिय टेलिभिजन मार्फत सम्बोधन गरि चुनावमार्फत प्रजातन्त्र स्थापना गराउने घोषणा गरेका हुन ।

चुनाव घोषणा गरेपनि चुनावको मिति भने सैन्य प्रमुखले घोषणा गरेका छैनन । गत फेब्रअरी १ मा म्यानमारको निर्वाचित सरकारलाई अपदस्थ गरी सेनाले सत्ता हातमा लिएपछि त्यसको विरोधमा निरन्तर प्रदर्शन भइरहेको छ । सैन्य कु विरुद्धको प्रदर्शनमा हालसम्म ३५० भन्दा धेरैको मृत्यु भइसकेको छ ।