नेकपा माओवादी केन्द्रका अध्यक्ष पुष्पकमल दाहालले एकदुई दिनमै सरकारलाई दिएको समर्थन फिर्ता लिने बताएका छन् । बृहत नागरिक आन्दोलनले शनिबार गरेको अन्तरक्रियामा दाहालले संसद विघटनलाई असंवैधानिक भनेर सडकमा गएका दलहरुबाटै हतारमा समर्थन फिर्ता नलिन आफूमाथि दबाव रहेकाले समर्थन फिर्ता नलिएको बताए ।

अध्यक्ष दाहालले जन्मिसकेको बच्चालाई फेरि गर्भमा राख्ने अनौठो काम अदालतले गरेको टिप्पणी पनि गरे । उनले नेकपा माओवादी केन्द्र र एमाले ब्यूँताउने फैसला गरेर अदालतले दिउँसै रात पार्ने काम गरेको बताए ।

उनले पछिल्लो राजनीतिक घटनाक्रम र सेटिङले आफू र आफ्नो दलमाथि अन्याय भएको भन्दै यसबारे बोलिदिन पनि आग्रह गरे । त्यस्तै एमालेका वरिष्ठ नेता माधवकुमार नेपालले आफूलाई घोक्रयाएर पार्टीमा फर्काइएको टिप्पणी गरे । सर्वोच्च अदालतको फागुन २३ को फैसलातर्फ संकेत गर्दै उनले आफूलाई प्रतिगमनकारी केपी ओलीकै पार्टीमा पठाएको र त्यहाँ बस्न अफ्ठेरो लागिरहेको बताए । नेता नेपालले शुक्रवारको संसदीय दलको बैठकमा सहभागी नभएर त्यसको संकेत देखाइसकेको पनि बताए ।

जसपा अध्यक्ष महन्थ ठाकुरले आफूहरुले निरन्तर रुपमा माओवादी केन्द्र र त्यसका अध्यक्ष पुष्पकमल दाहाललाई समर्थन गरे पनि मधेस र मधेसी जनताको माग पूरा नगरेको आरोप लगाए । महन्थलाई दाहालले केपी ओलीलाई समर्थन गर्न खोजेको आरोप लगाएपछि अध्यक्ष ठाकुरले तपाईंहरु समर्थन गर्ने, आरोप हामीलाई लगाउने भनी उल्टै प्रतिप्रश्न गरेका थिए ।

नागरिक अगुवाहरुले केपी ओलीलाई ‘ओली’ बनाउने काम माओवादी केन्द्रका अध्यक्ष पुष्पकमल दाहालले गरेको टिप्पणी गरेका थिए । पार्टीको सबै विधि, विधान र चाहना ओलीको पाउमा राखेर उनलाई बलियो बनाउने काम दाहालले गरेको उनीहरुको भनाइ थियो । उनीहरुले मधेश आन्दोलन हुँदा मधेशमा युवाहरु मारिने काम ओलीको कमाण्डमा भएको भन्दै ओलीसँग सतर्क रहन जसपा अध्यक्षलाई सजग गराएका थिए ।