रेल विभागको टोलीले पूर्वपश्चिम रेलमार्ग निर्माणका लागि बाराको निजगढमा स्थलगत अनुगमन गरेको छ । निजगढ–हेटौंडा–भरतपुर खण्डको विस्तृत परियोजना प्रतिवेदन ‘डीपीआर’ निर्माणको क्रममा बाराको निजगढमा विवाद उत्पन्न भएपछि विभागको टोलीले अनुगमन गरेको हो ।

रेल विभागका महानिर्देशक प्रमिला बज्राचार्य सहितको प्राविधिक टोलीले बकैया किनारास्थित प्रस्तावित २ नम्बर रेखाङ्कन क्षेत्रको अनुगमन गरेको हो । विभागको प्रारम्भिक अध्ययनमा पुर्वपश्चिम रेलमार्गको लागि निजगढ क्षेत्रमा ४ स्थानबाट रेखाङ्कन गरिएको थियो । जसमध्ये विभागले स्थानीय तहसंग समन्वय नै नगरी १ नम्बर रेखाङ्कनमा सर्भे कार्य शुरु गरेपछि स्थानीयले अवरोध गरेका थिए । बकैया खोलाको पूर्वी किनारबाट रेलमार्ग बनाउदा उपयुक्त हुने स्थानीयको भनाइ छ ।

निजगढ नगरपालिकामा भएको सर्वपक्षीय भेलाले निजगढ पश्चिमको बकैया खोलको पुर्वी किनारमा पर्ने २ नम्बर रेखाङ्कनको सर्भे गर्ने सहमति भएपछि विभागको टोलीले सो क्षेत्रको स्थलगत अनुगमन गरेको हो । बकैयाखोलाको पूर्वी किनारलाई समाउँदै रेलमार्ग लैजाँदा मानवबस्ती, निजी खेतीयोग्य जमीन नपर्ने, तटबन्धको दीर्घकालीन समस्यासमेत समाधान हुने नगरपालिकाको भनाइ छ ।

अनुगमन र स्थानीयसँगको छलफलपछि रेल विभागले पनि थानीयको धनमालमा क्षेति नपुग्ने गरी काम गर्ने प्रतिबद्धता जनाएको छ । बकैया खोला पुलपारि पश्चिमी किनारलाई समेत विकल्पको रूपमा अघि बढाउन विभाग सकारात्मक देखिएको छ ।

पूर्व–पश्चिम रेलमार्गको निजगढ–हेटौंडा–भरतपुर खण्ड बाहेक अन्य खण्डको डीपीआर पुरा भइसकेको छ । यसअघि गरिएको उक्त खण्डको डिपिआरमा निकुञ्ज र वन्यजन्तु आरक्ष क्षेत्र परेपछि सरकारले पुन ः डीपीआर गर्न लागेको हो । पूर्व पश्चिम रेलमार्ग अन्तर्गत बर्दिबासबाट पश्चिम र निजगढ पूर्वी खण्डमा ठेक्का सम्झौता भई निर्माण कार्य पनि अघि बढिसकेको छ । रेलमार्गको निम्ति कम्तीमा पनि ५० मिटर चौडाईको भू—भाग आवश्यक पर्ने र हाललाई ३ सय ५० मिटर दायाँ—बायाँको क्षेत्रलाई समेटेर सर्भे गरिने बताइएको छ ।