बाजुरा जिल्लाको कोल्टी खाद्य डिपोमा चामल सकिएसँगै जिल्लाको उत्तरी क्षेत्रमा खाद्य संकट निम्तिएको छ । खाद्यान्न ढुवानीमा समस्या हुँदा खाद्य ब्यवस्था तथा ब्यापार कम्पनी लिमिटेड कोल्टी शाखामा चामल अभाब भएको हो । खाद्यान्न अभाव हुन थालेपछि बाजुराको कोल्टी खाद्य ब्यवस्था तथा व्यापार कम्पनी लिमिटेडले नागरिकता हेरेर एक जनालाई दस किलो मात्र चामल दिन थालेको छ ।

लिमिटेडमा अहिले १ सय १८ क्वीन्टल खाद्यान्न मौज्जाद रहेको छ । जिल्ला प्रशासन कार्यालय बाजुराले कोल्टी शाखामा चामल अभाब शुरु भएको भन्दै प्रति ब्यक्ति नागरिकताको आधारमा १० केजी बिक्रि गर्न निर्देशन दिएको छ । सोही अनुसार डिपोले हप्तामा एक दिन बुधवार मात्र १० केजीका दरले बिक्रि गर्ने गरेकोे छ । संस्थानमा चामल सकिएपछि स्थानीय महँगो चामल किनेर खान बाध्य भएका छन् । खाद्य व्यवस्था तथा व्यापार कम्पनी लिमिटेड कोल्टी शाखामा मोटो चामल एक केजीको ४८ रुपैयाँ पर्छ भने बजारमा सोही चामलको प्रतिकेजी ७० रुपैयाँ भन्दा बढी पर्छ ।

मार्तडी कोल्टि सडक बर्षातले अबरोध पारेपछि ढुवानी नहुँदा जिल्लामा खाद्यान्न अभाव भएको हो भने बजारमा मुल्य आकासिएको हो । बाजुराका पूर्व उत्तर क्षेत्रका चार वटा स्थानिय तहका बासिन्दाले खाद्यान्नको चरम संकट झेलिरहेका छन् ।।