कक्षा १२ को परीक्षा निर्धारित मितिमै हुने राष्ट्रिय परीक्षा बोर्डले प्रस्ष्ट पारेको छ । कक्षा १२ को परीक्षा अन्योलमा परेको तथा अकस्मात स्थगित भएको भनेर आएका खबरको पछि नलाग्न पनि बोर्डले आग्रह गरेको छ ।

परीक्षाका लागि अन्तिम तयारी भैरहेको बोर्डले जनाएको हो । कोरोना सङ्क्रमणको दर बढ्दै गएकाले परीक्षा भर्चुअल वा भौतिक कसरी सञ्चालन गर्ने छलफल भइरहेको स्वास्थ्य मन्त्रालयले जनाएको थियो । तर बोर्डले भौतिक रुपमै परीक्षा हुने स्पष्ट पारेको छ । कक्षा १२ को परीक्षा होम सेन्टरमा हुनेछ ।

विद्यालयका भवन खाली रहेको अवस्था र दुर्गममा सङ्क्रमणको अवस्था सामान्य नै रहेकाले ठूलो समस्या नरहेको बोर्डको भनाइ छ । बोर्डले साउन ३१ गतेदेखि सञ्चालन हुने परीक्षाको तालिका यसअघि नै सार्वजनिक गरिसकेको छ । जेठ २६ गते हुनुपर्ने परीक्षा कोरोनाका कारण पछि सरेको हो । यो बर्ष झण्डै तीन लाख ८६ हजार विद्यार्थी परीक्षामा सहभागि हुँदैछन ।