बालुवाटारस्थित ललितानिवास जग्गा प्रकरणमा भ्रष्टाचारको मुद्दामा मुछिएका नेपाली कांग्रेसका उपसभापति विजयकुमार गच्छदार १० लाख रुपैयाँ धरौटी बुझाएर रिहा भएका छन् । विशेष अदालतमा आज भएको थुनछेक बहसपछि अदालतले १० लाख रुपैयाँ धरौटी सहित गच्छदारलाई रिहाई गर्न आदेश दिएको थियो ।

बालुवाटारको १ सय १३ रोपनी सरकारी जग्गा किर्ते गरी व्यक्तिको नाममा दर्ता गर्ने काममा मन्त्रिपरिषद्मा प्रस्ताव लैजान विभागीय मन्त्रीको रुपमा कार्य गरेको अभियोगमा गच्छदारमाथि मुद्दा लागेको थियो । उनी लामो समय फरार रहेर बुधबार विशेष अदालतमा हाजिर भएका थिए । गत वर्ष अख्तियार दुरुपयोग अनुसन्धान आयोगले ललितानिवास जग्गा प्रकरणमा १ सय ७५ जना विरुद्ध भ्रष्ट्राचारको मुद्दा दायर गरेको थियो । जसमध्ये पूर्वउपप्रधानमन्त्री समेत रहेका गच्छदारको नाम उल्लेख थियो । उनीमाथि ९ करोड ६५ लाख रुपैयाँ भ्रष्टाचार गरेको आरोप छ ।।