शेयर बजारमा नेप्से परिसूचक र कारोबार रकम दुवैमा भारी वृद्धि भएको छ । साताको पहिलो कारोबार दिन आज नेप्से परिसूचक ७३ दशमलव ३३ अंक बढेर २८९८ दशमलव ४३ विन्दुमा पुगेको छ । नेप्सेसँगै कारोबार रकममा पनि सुधार आएको छ ।

गत साता दैनिक औषतमा साढे ४ अर्ब कारोबार भएको बजारमा आज ८ अर्बभन्दा बढीको शेयर खरिदबिक्री भएको छ । आज २२५ कम्पनीको ३ करोड १५ लाख ८८ हजार कित्ता शेयर ८ अर्ब ६ करोड १३ लाख ८२ हजार रुपैयाँ खरिदबिक्री भएको छ । कारोबारमा आएका २१ कम्पनीहरुको शेयर सकारात्मक सर्किट लेभलमा खरिदबिक्री भएको छ । कारोबारमा आएका सबै उपसमूहको परिसूचक उकालो लागेको छ ।

जसमध्ये वित्त उपसमूहको परिसूचक सर्वाधिक ८ दशमलव ३९ प्रतिशत बढेको छ भने विकास बैंकको ८ दशमलव २४ प्रतिशत बढेको छ । त्यसैगरी, बैंकिङ्ग, जलविद्युत, निर्जीवन बीमा, लघुवित्त, जीवन बीमा र लगानी उपसमूहको परिसूचक पनि २ प्रतिशतभन्दा बढी बढेको छ । एनआईसी एशिया बैंकको सबैभन्दा बढी ३९ करोड ९३ लाख रुपैयाँ बराबरको शेयर खरिदबिक्री भएको छ ।