नेकपा एमालेको दशौं राष्ट्रिय महाधिवेशन आयोजक कमिटीको बैठकमा वरिष्ठ नेता झलनाथ खनाल, माधवकुमार नेपाल समूहका केहि नेताहरुलाई पनि बोलाइएको छ । बुधबार विहान ११ बजे बस्ने महाधिवेशन आयोजक कमिटीको बैठकमा माधव नेपाल समूहका ११ जना नेता छोडेर अन्य केन्द्रीय सदस्यहरुलाई बोलाइएको हो ।

वरिष्ठ नेता झलनाथ खनाल, नेता नेपाल, भीम रावल, रामकुमारी झाँक्री, कल्याणी खड्का लगायत एघार जनालाई भने बोलाइएको छैन । अध्यक्ष केपी ओलीले जेठ १० गते नेता खनाल, नेपाल सहितलाई पार्टीबाट निष्कासन गरेका थिए । कारबाहीमा परेकाबाहेक सवैलाई बैठकमा बोलाइएको एमालेले जनाएको छ ।

यो बैठकबाट दशौं राष्ट्रिय महाधिवेशन आयोजक कमिटी विघटन गर्ने तयारी छ । गएको २८ फागुनमा अध्यक्ष ओलीले दशौं महाधिवेशन आयोजक कमिटी बनाएपनि सर्वोच्च अदालतले मान्यता दिन अस्वीकार गरेको थियो । यसपछि २ जेठ २०७५ को एमाले पार्टी कमिटी, विधान र नेतृत्व कायम गर्ने तयारी अध्यक्ष ओलीले गरेका छन् ।