स्वास्थ्य तथा जनसंख्यामन्त्री शेरबहादुर तामाङले आगामी दिनमा कोभिड–१९ विरुद्धको खोप अग्रपंक्तिमा खट्ने खेल क्षेत्रका व्यक्तिहरुलाई पनि प्राथमिकतामा राखेर दिइने बताएका छन् । बुधबार नेपाल खेलकुद महासंघको ज्ञापन पत्र बुझ्दै मन्त्री तामाङले केही दिनमै कोभिड–१९ विरुद्धको खोपको सन्दर्भमा सकारात्मक खबर आउने भन्दै अग्रपंक्तिमा खट्ने खेल क्षेत्रका व्यक्तिहरुलाई पनि प्राथमिकता दिइने बताएका हुन् । उनले सरकार कोभिड १९ सँगसँगै अन्य रोगको उपचार पनि कसरी सहज बनाउन सकिन्छ भनेर लागिरहेको बताए ।

मन्त्री तामाङलाई ज्ञापनपत्र बुझाउँदै नेपाल खेलकुद महासंघले खेलाडी लगायत खेल क्षेत्रका लागि काठमाडौं उपत्यकामा ५ हजार मात्रा तथा प्रदेश र जिल्लामा आवश्यकता अनुसार कोभिड– १९ विरुद्धको खोप उपलब्ध गराउन आग्रह गरेको छ । त्यसैगरी आगामी दुई महिनाभित्र प्रत्येक नागरिकले खोप लगाउन सक्नेगरी व्यवस्था गर्न, पिसिआर परिक्षणलाई सहज र फराकिलो बनाउन, खेलकुद क्षेत्रलाई प्राथमिकता दिइ राष्ट्रिय खेलकुद परिषद् त्रिपुरेश्वरमा खोप केन्द्र सञ्चालन गर्न महासंघले अनुरोध गरेको छ ।