प्रधानसेनापति पूर्णचन्द्र थापाले अहिलेको राजनीतिक संकट राजनीतिक बाटोबाटै समाधान हुने विश्वास व्यक्त गरेका छन् । आफ्नो कार्यकालको एक हजार दिन पुगेको अवसरमा जंगीअड्डामा आइतबार आयोजित कार्यक्रममा प्रधानसेनापति थापाले राजनीतिक समस्याको संवैधानिक निकास नै होस् भनी आफूले चाहेको बताए ।

उनले अहिलेको घटनाक्रमलाई नजिकबाट नियालिरहेको र सेना जानकार रहेको पनि पत्रकार भेटघाटका क्रममा बताएका छन् । उनले सेनालाई कमजोर नसम्झन र विगतमा सेनाको गौरवपूर्ण इतिहास सम्झन पनि सबैसँग अनुरोध गरेका छन् । उनले आफ्नो एक हजार दिनको कार्यकालको आफूलाई पछुतो नरहेको पनि बताए ।

उनले आगामी भदौ २६ मा आफ्नो अवकाश हुने र अहिल्यैदेखि त्यसको तयारी सुरु भएको पनि बताए । उनले आफूले कार्यकालको सुरुमा सञ्चालन गरेको ‘प्रधानसेनापतिसँग सेना’ कार्यक्रममा १०० वटासम्म प्रश्न आउने र पछिल्लो समयमा ६ वटा प्रश्नमा सीमित भएको बताए ।