गण्डकी प्रदेशसभाको बैठक सवै सांसद्को कोरोना परीक्षण रिपोर्ट आएपछि मात्रै बस्ने भएको छ । मंगलबार सत्तारुढ एमालेका सांसद्हरुले कोरोनाको जोखिम रहेकाले पिसीआर टेष्टको नतिजा ल्याउनुपर्ने माग गर्दै बैठक अवरुद्ध गरेपछि बसेको कार्यव्यवस्था परामर्श समितिको बैठकमा सबै सांसद्को कोरोना परीक्षण गर्ने सहमति जुटेको हो ।

परीक्षणपछि कोरोना पोजेटिभ देखिएका सांसदले बुधबार हुने मतदानमा भाग लिन पाउने भए पनि बोल्न भने दिइने छैन । प्रदेससभाको बैठक बुधबार दिउँसो १ बजे बोलाइएको छ । अधिकांश सांसद दीर्घरोगी रहेकाले पिसीआर टेष्ट नभइ संसद् सञ्चालन गर्न नहुने माग एमाले सांसदहरुले गरेका छन् ।

सभामुख नेत्रनाथ अधिकारीले पटक पटक वस्न आग्रह गर्दा पनि सत्तापक्षका सांसदहरुले उठेर विरोध जनाएपछि आजको बैठक स्थगित भएको थियो । प्रदेशसभामा मुख्यमन्त्री पृथ्वीसुव्वा गुरुङ विरुद्ध आइतबारमात्रै अविश्वासको प्रस्ताव टेबुल भएको हो । मंगलबार सो विषयमा छलफल हुने कार्यसूची थियो ।