लहान नगरपालिका–८ स्थित मालपोत कार्यालयमा चैत १ गते दिउँसो बम बिस्फोट गराएको घटनामा संलग्न रहेको अभियोगमा प्रहरीले एक जनालाई पक्राउ गरेको छ । चैत एक गते दिउँसो १२ : ५० बजे सिरहा लहान नगरपालिका ८ को मालपोत कार्यालयमा कुकर बम बिष्फोट भएको थियो ।

उक्त घटनामा संलग्न भई फरार रहेका सिरहा लक्ष्मीपुर पतारी गाउपालिका ३ लवकाटोलका २० वर्षीय गुड्डु भन्ने रामजतन मुखियालाई ईलाका प्रहरी कार्यालय लहानबाट खटेको टोलीले शनिबार पक्राउ गरेको हो ।

सिरहा लहान नगरपालिका १ लोकतन्त्र चौकबाट पक्राउ गरी आवश्यक थप अनुसन्धानको लागि ईप्रका लहानमा राखि अनुसन्धान अगाडि बढाएको प्रहरीले जानकारी दिएको छ ।यसअघि उक्त घटनामा संलग्न भएको आरोपमा सुखिपुर नगरपालिका–५ बस्ने २५ वर्षीय रामरिझन यादव र लक्ष्मीपुर पतारी गाउँपालिका–३ बस्ने २६ वर्षीय अभिमन्यू गिरि पनि पक्राउ परेका थिए ।