सत्तारुढ प्रमुख घटक नेपाली काँग्रेसले जनताले न्याय पाउने कुरालाई अवरुद्ध हुन नदिन संसदमा प्रधानन्यायाधीश चोलेन्द्र शमशेर जबराविरुद्ध महाअभियोग प्रस्ताव दर्ता गर्नु परेको प्रारम्भिक टिप्पणी गरेको छ ।

पार्टी कार्यालय सानेपामा आइतबार भएको केन्द्रिय कार्य सम्पादन समितिको बैठकले सर्वोच्च अदालतमा देखिएको अवरुद्ध प्रक्रियालाई सूचारु गराउने विशेषव्यवस्था पनि भएकाले सोही अनुसार महाअभियोग अघि बढेको निस्कर्ष निकालेको हो । अवरुद्ध न्याय प्रक्रिया सुचारु गर्न महाअभियोग अघि बढेको कांग्रेस प्रवक्ता प्रकाशशरण महतले बताए ।

प्रवक्ता महतले एमसीसी संसदमा निर्णयार्थ पेश गर्ने र त्यसका लागि जनमत तयार पार्न देशव्यापी अभियान संचालन गर्ने निष्कर्षमा पनि पार्टी पुगेको बताए ।

प्रवक्ता महतले एमसीसी संसदबाट पारित गराउन आफ्नो पार्टीले पहल गर्ने र त्यसका लागि आवश्यक छलफल पार्टीको संसदीय दलमा पनि गर्ने निर्णय गरिएको बताए । काँग्रेसको बिहीबारदेखि सुरु भएको केन्द्रिय कार्यसम्पादन समितिको बैठकको निर्णय पर्सी फागुन ३ गते ३ बजे बस्ने बैठकले सार्वजनिक गर्ने काँग्रेसले जनाएको छ ।