नेकपा एमालेका महासचिव शंकर पोख्रेलले वर्तमान गठबन्धनको सरकारले स्थानीय तहको निर्वाचन धकेल्न खोजेको आरोप लगाएका छन् । बाँकेको खजुरा गाउँपालिका ३ मा निर्माण भएको सामुहिक आवासको उदघाटन गर्दै महासचिव पोखरेलले चुनाव टार्न खोज्नु वर्तमान सरकारको प्रतिगामी कदम भएको बताएका हुन् । उनले सरकार स्थानीय तहको निर्वाचन गर्न हिचकिचाएको भन्दै जनताको वीचमा जान गठबन्धन डराइरहेकोे टिप्पणी गरे ।

महासचिव पोखरेलले वर्तमान सरकारले मुलुकको अर्थतन्त्र ध्वस्त पारेको आरोप समेत लगाए । उनले मूल्य वृद्धि अहिलेसम्मकै उच्च विन्दुमा पुगेको र व्यापार घाटा बढ्दो क्रममा रहेको उल्लेख गर्दै तरलता अभावका कारण बैंकहरु लगानी गर्न नसक्ने अवस्थामा पुगेकोे बताए ।

बाँकेको खजुरा गाउँपालिका वडा नं. ३ मा अतिविपन्न परिवारका लागि १ करोड ७६ लाख भन्दा बढी लागतमा २१ वटा सामूहिक घर निर्माण गरिएको हो ।