निर्वाचन आयोगले बुधबार हुने राष्ट्रिय सभाको मतदानको सम्पूर्ण तयारी पुरा भएको जनाएको छ । सात प्रदेशका आठ मतदान स्थलमा १४ मतदान केन्द्रमार्फत् मतदान गराइने आयोगले जनाएको छ । प्रदेश १ मा दुई र अरु प्रदेशमा एक÷एक वटा मतदान स्थल छन् । आयोगका प्रवक्ता शालिग्राम शर्मा पौडेलले मतदानको सम्पूर्ण तयारी पुरा भएको र बुधबार बिहान ९ बजेदेखि ३ बजेसम्म मतदान हुने जानकारी दिए । निर्वाचन सकिए लगत्तै मतगणना पनि सुरु हुने उनले बताए ।

फागुन २० बाट नेकपा एमालेका ८, नेकपा एकीकृत समाजवादीका ४, नेकपा माओवादी केन्द्रका ४ र नेपाली कांग्रेसका ३ राष्ट्रिय सभा सदस्यको पदावधि सकिँदैछ । सदस्यको पदावधि सकिनु ३५ दिनअघि नै निर्वाचन गर्नुपर्ने व्यवस्थाअनुसार मतदान हुन लागेको हो । मतदानमार्फत् ७ महिला, ३ दलित, २ अपांगता भएका तथा अल्पसंख्यक र ७ अन्य समूह गरी १९ जना चुनिने छन् । १९ सिटका लागि ४३ उम्मेदवार चुनावी मैदानमा छन् । प्रदेश १ मा तीन, मधेस प्रदेशमा दुई, बागमतीमा दुई, गण्डकीमा तीन, लुम्बिनीमा तीन, कर्णालीमा तीन र सुदूरपश्चिम प्रदेशमा तीन पदका लागि निर्वाचन हुन लागेको निर्वाचन आयोगले जनाएको छ ।