प्रमुख प्रतिपक्षी नेकपा एमालेका अध्यक्ष केपी ओलीले प्रधानमन्त्रीका रुपमा आफूले दुई पटकसम्म गरेको संसद विघटनलाई ठीक भनेका छन् । उक्त निर्णयलाई असंवैधानिक र गलत भएको आवाज पार्टी भित्रै उठिरहँदा जारी केन्द्रीय कमिटी बैठकमा संसद विघटनबारे उठेका प्रश्नको जवाफ दिँदे उनले यस्तो भनेका हुन् ।

संसद विघटनसम्बन्धी आफ्नो कदमको बचाउका क्रममा उनले निर्वाचनमा जाने निर्णय कहिले पनि गलत नहुने तर्क गरेका छन् । च्यासलस्थित तुलसीलाल अमात्य स्मृति प्रतिष्ठानमा तीन दिनदेखि जारी केन्द्रीय कमिटी बैठकमा जवाफ दिने क्रममा उनले ताजा जनादेशमा जाने कुरालाई लोकतन्त्रमा गलत ठह¥याउन नसकिने बताएका छन् ।

अध्यक्ष ओलीले आफूलाई सरकार र पार्टीबाट हटाउन तत्कालीन अवस्थामा पुष्पकमल दाहाल र माधवकुमार नेपालले अनेक षड्यन्त्रका तानाबुना बुनेको पनि दाबी गरे । ओलीले पहिलो पटक २०७७ पुस ५ गते र दोस्रो पटक गत जेठ ७ गते राति प्रतिनिधिसभा विघटन गरेका थिए ।

तर उनको दुवै पटकको कदमलाई सर्वोच्च अदालतले उल्टाइदिएको थियो । सर्वोच्चले पछिल्लो विघटनविरुद्ध फैसला मात्रै दिएन, ओलीलाई सत्ताबाहिरको बाटो देखाउँदै कांग्रेस सभापति शेरबहादुर देउवालाई प्रधानमन्त्रीका रुपमा काम गर्न नै परमादेश दिएको थियो ।