इटहरी । विश्व आदर्श एकेडेमीको आयोजनामा पहिलो पटक सम्पन्न भिएसी भर्टेक्स–२०२६ ले सुनसरी र मोरङ जिल्लाका विद्यालयस्तरीय विद्यार्थीहरूलाई विज्ञान, सृजनशीलता र स्वस्थ प्रतिस्पर्धाको एक साझा मञ्च प्रदान गरेको छ । दुई दिनसम्म सञ्चालन भएको यस शैक्षिक कार्यक्रमले पाठ्यपुस्तकमै सीमित सिकाइलाई व्यवहारिक, प्रयोगात्मक र नवप्रवर्तनमुखी बनाउने उद्देश्य लिएको आयोजकले जनाएको छ ।
कार्यक्रममा सुनसरी र मोरङका १९ वटा विद्यालयबाट सहभागी भएका ती मध्ये ८ वटा विद्यालयका तीन–तीन जना विद्यार्थीहरु बीच विभिन्न विधामा प्रतिस्पर्धा गराइएको थियो । पहिलो दिन विज्ञान प्रदर्शनी र हाजिरी जवाफ प्रतियोगिता सम्पन्न भएको थियो भने दोस्रो दिन पोस्टर प्रदर्शनी, उच्च दक्षता, चित्रकला तथा सृजनशील प्रस्तुतिसम्बन्धी प्रतियोगिता सञ्चालन गरिएको थियो। हाजिरी जवाफ, शैक्षिक प्रदर्शनी, सृजनशील प्रस्तुति र बौद्धिक प्रतिस्पर्धा गरी चार प्रमुख विधामार्फत विद्यार्थीहरूले आफ्नो ज्ञान, तर्कशक्ति, प्रस्तुतीकरण क्षमता र नवप्रवर्तनशील सोच प्रस्तुत गरेका थिए ।

प्रतियोगिताको विज्ञान चुनौती अन्तर्गत, अरिहन्त इग्लिस स्कुलले पहिलो, खनार सनसाइनले दोस्रो र एसओएस हर्मन गेमिनरले तेस्रो स्थान हासिल गरे ।
बौद्धिक प्रतिस्पर्धा तर्फ सीबी रेसिडेन्सियल सेकेन्डरी स्कूल पहिलो, पाथीभरा इङ्लिस बोर्डिङ स्कूल दोस्रो तथा सुनसरी क्रिस्टल तेस्रो स्थानमा रहे।
त्यस्तै प्रगतिका लागि पोस्टर विधामा फुजिसन सगरमाथाले पहिलो, अरिहन्तले दोस्रो र विश्वआदर्शले तेस्रो स्थान हात पारे ।
जनताको रोजाइ पुरस्कार विधाबाट पाथीभरा इन्ट्रो भिडियोलाई प्रदान गरिएको थियो । व्यक्तिगत विधातर्फ थिंकरमा अरिहन्तका प्रिन्स कार्की, सिल्भरमा लिटल फ्लावरका सिमांकन बराल र क्रिएटरमा फुजिसनका रिकेश श्रेष्ठ उत्कृष्ट घोषित भए ।

कार्यक्रमको समग्र नतिजा अन्तर्गत प्रथम हुन सफल अरिहन्त इङ्लिस बोर्डिङ स्कूल विराटनगर दोस्रो स्थानमा एसओएस हर्मन माइनर र सीबी रेसिडेन्सियल सेकेन्डरी स्कूल तेस्रो स्थानमा रहे । उत्कृष्ट हुने समूहलाई क्रमर्श २० हजार,१५ हजार र १० हजार नगद पुरस्कार सहित प्रमाणपत्र र शिल्ड प्रदान गरिएको थियो ।
कार्यक्रमका अध्यक्ष लेखनाथ घिमिरेले यस्ता शैक्षिक गतिविधिले विद्यार्थीहरूको सर्वाङ्गीण विकासमा महत्वपूर्ण योगदान पु¥याउदै सहभागीहरु हुनु नै विद्यार्थीहरुको सफलता भएको बताए ।

उनले पाठ्यपुस्तकको ज्ञानसँगै व्यवहारिक सीप, सिर्जनशील सोच र आत्मविश्वासको विकास आजको आवश्यकता रहेको उल्लेख गरे ।
विश्व आदर्श एकेडेमीका कार्यक्रम निर्देशक सुजन पुरीले भिएसी भर्टेक्स पहिलो संस्करण भए पनि यसलाई आगामी दिनमा विद्यालयस्तरबाट प्रदेश, राष्ट्रिय हुँदै अन्तर्राष्ट्रिय स्तरसम्म विस्तार गर्ने दीर्घकालीन लक्ष्य रहेको जानकारी दिए ।
भिएसी भर्टेक्स–२०२६ ले विद्यार्थीहरूमा ज्ञान, सृजनशीलता र स्वस्थ प्रतिस्पर्धाको संस्कार विकास गर्दै शैक्षिक क्षेत्रमा नयाँ अभ्यासको सुरुवात गरेको आयोजकको विश्वास छ ।